2014/05/08

好耐無見又出來同你遊水

上次喺天堂大島同旋轉海豚游水,已經過一星期,期間我們每天清早八九點就去到沙灘,但都不見他們踪影。心想會否和我們找北極光一樣,想看的就只是曇花一現,之後消失無踪?

我們相信Zach和海豚是有緣,如果唔係點會賜俾我哋呢兩個可以話去就去嘅父母,嘅坦桑尼亞同伊朗都見到海豚,而又嚟到大到呢度 ? 前一晚早啲上床,一早起身七點已見陽光普照,海面平靜清晰,心感如果我是海豚,也想出來伸展一下見見人。

急急吃過早餐收拾午餐及游水裝備,來到黑沙灘,已經見到一堆鰭喺不遠處游移。我們便急急熱身下水,並帶同佢哋喜歡嘅玩具:從沙灘邊大樹落下嘅大紅樹葉。

游到離岸一百米,旋轉海豚好像知道 Zach嚟咗,有一兩個有善海豚圍住我哋游大圈,又用眼睇我哋。要知道海豚用聲納已經辨明四周,讓我哋睇佢哋嘅眼其實係兩者靈魂接觸。其實係我哋人類愚拙,往往要用眼睇萬物嚟確定現實,睇唔到當無;但其他生物有其多元嘅感觀能力,而海豚就有聲納,可以感知天下非眼睇到嘅世界。佢哋嘅現實比我哋嘅豐富好多,而我哋自以為是認為我哋所看嘅先係現實。



海豚鍾意玩樹葉,我帶去嘅樹葉半浮喺水中,佢哋就用前鰭接住,一係傳俾其他海豚,一係由前鰭傳到背鰭又傳到尾鰭,好似自己玩拋波咁。



叫得做旋轉海豚,因為佢地鍾意跳出水面旋轉。我認為有一兩個鐘意我,而又特別活躍,係我前面跳水俾我睇。後來聽講啲小海豚特別喜歡跳離水係要整走身上寄生魚,但很奇怪地啲海豚媽媽又唔會幫嘅細路。睇嚟海豚媽媽比較忍心要嘅子女自己解決問題。



佢哋仲識整蠱我,當我集中精神影緊一對母子,突然我聽身後"click-click"聲,一隻小海豚喺我前面遊過及轉身。好似要俾個驚嚇我。



呢個黑沙灘係海豚嘅睡房,當佢哋喺夜晚打獵到天光,日出後兩三小時到翻房,臨睡前玩下,當然想唔想見人由佢哋決定。如果唔想見人,佢哋有呢一個睡房遠離人煙。這樣的生活較有尊嚴,唔似喺島上一間豪華酒店飼養海豚俾住客玩,被屈喺一個小小的水池,好似喺馬戲團或海洋公園度當小丑,極不尊重這智慧生物的尊嚴。

其實跟據當地保護動物指引,在這海豚休息的地方,人要和他們保持距離,否則缺乏休息會影響他們覓食及照顧子女。 所謂適當距離係至少有半個美式足球場咁遠,如果喺水底可以睇見佢哋,就已經係太近。所以我哋都會檢點一啲,每次落水睇唔會超過半個鐘,喺佢哋訓覺時間(約上午十時至下午三時),就唔落水同佢哋玩。佢哋有啲比較心野,一見到有人就走埋去,唔理自己休息時間。 佢哋訓覺時仍然會游水,容易令人誤會仲好活躍,但係其實佢哋熄咗聲納,每次一邊腦袋休息而另一邊活躍,輪流休息。

當然有好多人唔知,喺佢哋訓覺時騷擾佢哋。

人就係咁自私,為私慾唔理其他。

沒有留言:

張貼留言